പട്ടാളക്കാരൻ എപ്പോളും ഒരു ബഹുവ്രീഹി സമാസമാണ്.

തോക്കിന്റെ കുഴൽവട്ടത്തിന് അപ്പുറം വെളിച്ചം നിലാവ് കൊണ്ടളക്കുന്നവൻ ആരോ അവൻ.

അമ്മയുടെ ദൈന്യത പുരട്ടിയ ഏകാന്തങ്ങളെ ഓർമയിൽ പൂട്ടിയിട്ടവനാരോ അവൻ.

സ്വപ്നം പകുത്തവളെ കണ്ണീർക്കെട്ടിൽ ഉന്തിയിട്ട് കരയിൽ ബാക്കിയാകുന്നവനാരോ അവൻ.

തണുത്ത് വിറച്ച മരണത്തെ മാറത്തെ കമ്പിളിച്ചൂടിൽ കാക്കുന്നവനാരോ അവൻ.

വെറുപ്പ് പുകയുന്ന താഴ്‌വരകളിൽ സഹനം കൊണ്ട് ഉണ്മ പാകിയവനാരോ അവൻ.

ഊർജ്ജ സിരകളിൽ പടർന്ന ആത്മവീര്യം കൊണ്ട് ഉരുക്കു നെഞ്ച് പണിഞ്ഞവനാരോ അവൻ.

അനേക കോടി ചോദ്യ ചിഹ്നങ്ങൾക്കും ഏറെ മേലെ

തെളിഞ്ഞു കത്തുന്ന ഒരു വലിയ ആശ്ചര്യ ചിഹ്നം ആകുന്നവനാരോ അവൻ.